Шымкентте мектеп мұғалімі кәмелетке толмаған оқушыға қатысты күдікпен ұсталды
Шымкент қаласында мектеп мұғаліміне қатысты кәмелетке толмаған оқушыға әдепсіз әрекет жасады деген күдікпен қылмыстық іс қозғалды. Зардап шеккен қыздың анасының айтуынша, бала сабақтан кейін үйіне психологиялық күйзеліс жағдайында оралып, дене ауырсынуына шағымданған.
Анасының сөзінше, біраз уақыттан кейін оқушы 36 жастағы мұғалімнің оны өз еркінен тыс ұстап, әдепке жат әрекеттер жасағанын айтқан. Қыздың бірнеше рет босатуды сұрағанына қарамастан, педагог оның өтініштерін елемей, күш қолданғаны хабарланады.
Оқиғадан кейін ата-аналар мектеп әкімшілігіне жүгінген. Алайда, олардың айтуынша, білім беру мекемесінің басшылығы бейнебақылау камераларындағы жазбаларды көрсетуге келіспеген. Бұл жағдай тараптар арасында жанжалға ұласып, соның салдарынан баланың әкесі дене жарақатын алған.
Бейнежазбалар тек полиция шақырылып, тиісті мемлекеттік органдарға ресми арыз түсірілгеннен кейін алынған. Анасының мәлімдеуінше, камера кадрларында мұғалімнің оқушыны қарсылық білдіргеніне қарамастан күштеп өзіне жақындатып, тізесіне отырғызғаны байқалады. Ал күдікті ұстаз ата-аналармен кездескен кезде нақты түсініктеме бере алмаған.
Аталған дерекке қатысты түсініктеме берген Шымкент қалалық полиция департаменті өкілдерінің мәліметінше, баланың анасының арызы негізінде қылмыстық іс тіркелген. Күдікті ретінде Шымкент қаласының тұрғыны ұсталып, полиция бөлімшесіне жеткізілген.
Қазіргі уақытта тергеу-жедел тобы оқиғаның барлық мән-жайын жан-жақты, толық әрі объективті анықтауға бағытталған кешенді тергеу амалдарын жүргізіп жатыр. Бейнебақылау жазбалары зерделеніп, куәлардан жауап алынуда, барлық деректер мен дәлелдер мұқият тексеріліп, салыстырылуда. Тергеу барысы департамент басшылығының ерекше бақылауында.
Құқық қорғау органдары кәмелетке толмағандарға қатысты кез келген заңсыз әрекет қатаң түрде жазаланатынын және кінәлі тұлғалар қолданыстағы заңнама аясында жауапкершілікке тартылатынын мәлімдеді.
Жеті жасар қыз мұғалімнің арам пиғылын әшкере етті
