Синоптиктер 11–13 ақпан аралығында Астана мен Алматыда қандай ауа райы күтілетінін хабарлады.
Астана қаласы
11 ақпан
Ауа райы құбылмалы бұлтты болады. Түнде және таңертең қар жауып, көктайғақ пен боран күтіледі. Кей уақыттарда тұман түседі. Жел оңтүстік-батыстан соғып, секундына 9–14 метрге жетеді, екпіні 20–23 м/с-қа дейін күшеюі мүмкін. Ауа температурасы түнде де, күндіз де –13…–15 градус шамасында болып, күндіз біртіндеп төмендейді.
12 ақпан
Жауын-шашынсыз, аспан жартылай бұлтты. Желдің жылдамдығы 5–10 м/с. Түнде ауа температурасы –23…–25 градусқа дейін төмендеп, күндіз –17…–19 градус болады.
https://vt.tiktok.com/ZSmLLxpUV/
13 ақпан
Бұлт аралас ашық ауа райы сақталады, жауын-шашын күтілмейді. Жел оңтүстік-шығыстан баяу соғады (2–7 м/с). Түнгі аяз –25…–27 градусқа дейін жетіп, күндіз –13…–15 градус шамасында болады.
Алматы қаласы
11 ақпан
Аспан құбылмалы бұлтты. Күндіз жаңбыр мен қар аралас жауын-шашын күтіледі, кешке қарай әлсіз тұман түсуі мүмкін. Жел бағыты оңтүстік-шығыстан солтүстік-батысқа ауысады, жылдамдығы 3–8 м/с. Түнде ауа температурасы 0…+2 градус, күндіз +8…+10 градусқа дейін жылынады.
12–13 ақпан
Бұл күндері де ауа райы тұрақсыз болады: кей уақыттарда жаңбыр мен қар жауып, тұман түседі, жолдарда көктайғақ болуы мүмкін. Жел солтүстік-батыстан соғады (3–8 м/с). Түнде –3…–5 градус, күндіз 0…+2 градус шамасында болады.
Ел аумағындағы ауа райы
Синоптиктердің мәліметінше, алдағы күндері Қазақстанның басым бөлігінде мол жауын-шашын күтіледі. Одан кейін антициклон әсерінен ауа райы күрт суытып, кей өңірлерде аяз –30 градусқа дейін жетуі мүмкін.
