Алматы көшелерінде соңғы күндері патрульдік көліктердің күрт көбейгенін байқаған жұрт арасында түрлі әңгіме тарағаны рас. Әсіресе, басқа өңірлердің нөмірімен жүрген полиция экипаждарын көрген жүргізушілер “жаппай рейд басталды ма?” деген сұраққа жауап іздей бастады. Бұл жағдайға байланысты Ішкі істер министрлігі ресми түсініктеме беріп, қалада “Стоп-нарушения” атты ауқымды профилактикалық операция басталғанын мәлімдеді. Аталған шара аясында Алматыға Астана қаласынан, сондай-ақ Ақмола, Қарағанды және Жамбыл облыстарынан қосымша патрульдік күштер тартылған. Полицияның айтуынша, мұндай қадамның басты мақсаты – жол қауіпсіздігін күшейту, құқықбұзушылықтың алдын алу және жүргізушілердің тәртібін арттыру. Яғни, бұл – тексеру үшін ғана емес, жалпы қаладағы тәртіпті жүйелі түрде бақылауға бағытталған кешенді жұмыс. Алматы қалалық полиция департаментінің басшысы Айдын Қабдулдинов қызметкерлерге нақты міндет жүктеп, әрбір әрекет заң аясында, ашық әрі кәсіби деңгейде орындалуы тиіс екенін атап өтті. Оның сөзінше, полицияның басты міндеті – азаматтардың қауіпсіздігін қамтамасыз етіп, қоғамдық тәртіпті сақтау. Айта кету керек, бұған дейін әлеуметтік желілер мен мессенджерлерде қалаға басқа өңірлерден арнайы патрульдер жіберіліп жатқаны туралы хабарламалар кеңінен тараған еді. Кейін жүргізушілердің өздері де жолда өзге аймақтардың нөмірін таққан полиция көліктерінің көбейгенін жазып, бұл ақпаратты растай түсті. Министрлік мұндай тәжірибе тек Алматыға ғана тән емес екенін жеткізді. Қажет болған жағдайда еліміздің кез келген өңіріне қосымша күш жіберіліп, жедел ахуалға байланысты алдын алу шаралары тұрақты түрде жүргізіліп отырады. Соңғы уақытта орын алған қайғылы жол апаттары да мұндай қатаң бақылаудың қажет екенін көрсетті. Соның бірі – әл-Фараби мен Меңдіқұлов көшелерінің қиылысында болған жантүршігерлік жол-көлік оқиғасы. Mercedes пен Zeekr автокөліктері соқтығысып, салдарынан үш адам көз жұмды. Алдын ала мәлімет бойынша, екінші көліктің жүргізушісі мас күйде болған. Осы оқиғалардан кейін жолдағы тәртіпті күшейту – уақыт талабы екені анық байқалды. Сондықтан полицияның күшейтілген режимде жұмыс істеуі – жай ғана науқан емес, азаматтардың өмірін сақтауға бағытталған маңызды шара. Алматыдағы патрульдердің көбеюі – тұрғындарды алаңдататын жағдай емес, керісінше, қауіпсіздікті арттыруға арналған нақты қадам деуге болады.
Алматыда ауқымды рейд басталды
