Алматыда соңғы күндері жол қауіпсіздігіне қатысты жағдай күрт күшейді. Қала көшелерінде “Стоп-нарушения” атты ауқымды жедел-профилактикалық шара өтіп жатыр. Полиция бұл рейдтің жай тексеріс емес, тәртіпті түбегейлі реттеуге бағытталған нақты қадам екенін ашық айтып отыр. Екі күннің ішінде-ақ нәтиже көзге бірден түскен. Ресми деректерге сүйенсек, 4 828 жол ережесін бұзу дерегі анықталған. Бұл – Алматыдағы көлік қозғалысында тәртіп мәселесі әлі де өзекті екенін көрсетеді. Әсіресе, адам өміріне тікелей қауіп төндіретін өрескел заңбұзушылықтарға ерекше назар аударылған. Мәселен, 44 жүргізуші көлікті мүлде жүргізу құқығынсыз айдаған. Тағы 8 адам бұған дейін жүргізу куәлігінен айырылса да, қайтадан рульге отырған. Сонымен қатар, жалған нөмір тағып жүргендер де анықталған – мұндай 8 дерек тіркелді. Ал қарсы жолаққа шығып кеткен 15 жағдай – жол апатына әкелуі мүмкін ең қауіпті әрекеттердің бірі. Рейдтің ең қатты сезілген тұсы – көліктердің жаппай айыптұраққа жеткізілуі болды. Екі күн ішінде 2 мыңнан астам автокөлік арнайы тұрақтарға қойылған. Олардың ішінде шетелдік тіркеудегі машиналар да бар. Бұл – талаптың барлығына бірдей екенін көрсететін қадам. Алматы қалалық полиция департаментінің әкімшілік полиция басқармасының басшысы Абдинур Тасыбаевтың айтуынша, басты мақсат – статистика жинау емес, нақты қауіптің алдын алу. Яғни, рульге мас күйінде отыру, құқығы жоқ бола тұра көлік жүргізу немесе жалған нөмір пайдалану сияқты әрекеттерге мүлде төзім болмайды. Айта кету керек, бұл шараның басталуына жақында болған қайғылы оқиға да әсер еткен. 21 наурыз күні әл-Фараби даңғылы мен Меңдіқұлов көшесінің қиылысында ауыр жол апаты тіркеліп, үш адам қаза тапқан еді. Mercedes көлігіндегі 29 жастағы жүргізуші мен екі жас қыз оқиға орнында көз жұмды. Ал екінші көліктің жүргізушісі мас күйінде болғаны анықталған. Бұл жағдай қоғамда үлкен резонанс туғызды. Осыдан кейін құқық қорғау органдары жолдағы тәртіпті күшейтуге шындап кіріскен. Тіпті басқа өңірлерден – Астана, Ақмола, Қарағанды және Жамбыл облыстарынан қосымша полиция экипаждары тартылған. Қазір Алматы көшелерінде бақылау бұрынғыдан да қатаң. Полицияның бұл әрекеті кей жүргізушілерге қатаң көрінуі мүмкін. Бірақ шын мәнінде, мұның бәрі – адам өмірін сақтап қалу үшін жасалып жатқан шара. Себебі бір ғана қателік – бірнеше тағдырды өзгертіп жіберуі мүмкін.
Алматы көшелерінде жаппай бақылау күшейді
