Анна Данилина Италия астанасы Римде өтіп жатқан беделді WTA 1000 турниріндегі өнерін ширек финалда аяқтады. Қазақстанның жұптық сындағы бірінші ракеткасы америкалық серіктесі Аиша Мұхаммадпен бірге жартылай финалға бір қадам жетпей тоқтады.
Қазақстандық-америкалық жұп турнир барысында жоғары деңгейдегі ойын өрнегін көрсетіп, жанкүйерлер үмітін оятқан еді. Ал ширек финалда олар ресейлік теннисшілер Мирра Андреева мен Диана Шнайдер дуэтімен кортқа шықты.
Тартысты өткен кездесу екі сетке созылып, чемпиондық тай-брейкте шешілді. Алғашқы сетте Данилина мен Мұхаммад сенімді ойын көрсетіп, 6:4 есебімен басым түсті. Алайда екінші сетте қарсыластары қарымта қайтарып, есепті теңестірді 3:6. Матч тағдыры шешілген тай-брейк ерекше шиеленіске толы болды. Екі жұп та соңына дейін күрескенімен, сәттілік қарсыластар жағында болып, кездесу 9:11 есебімен аяқталды.
1 сағат 31 минутқа созылған матчта Данилина мен оның серіктесі бірнеше мүмкіндікке ие болғанымен, шешуші сәттерде қателіктерге жол берді. Соған қарамастан, қазақстандық теннисші турнир барысында өзінің мықты дайындығын тағы бір мәрте дәлелдеді.
Айта кетейік, Римдегі WTA 1000 санатындағы турнир әлемнің үздік теннисшілері қатысатын ең беделді жарыстардың бірі. Анна Данилинаның мұндай ірі додада ширек финалға дейін жетуі қазақстандық теннистің халықаралық аренадағы беделінің артып келе жатқанын көрсетеді. Жанкүйерлер енді оның алдағы жарыстарда бұдан да жоғары нәтиже көрсететініне сенім білдіруде.
