Қазақстанның семсерлесу құрамасы Мысыр астанасы Каирде өтетін семсерлесуден әлем кубогының кезеңіне қатысады. 22–23 мамыр күндері өтетін халықаралық додада ел намысын ерлер арасындағы қылыштасу сайысында 10 спортшы қорғайды.
Қазақстан құрамасының бұл жарысқа тыңғылықты дайындықпен келіп отырғаны айтылуда. Әлемнің үздік семсерлесушілері жиналатын турнирде қазақстандық спортшылар тәжірибе жинап қана қоймай, жүлделі орындар үшін де талас жүргізбек.
Құрама сапында Бексұлтан Әбжал, Қуаныш Ергашбай, Жанат Нәбиев, Қайназар Нұрқатұлы, Нұрсат Айтмырза, Артем Саркисян, Сұлтан Станбек, Нұрмұхаммед Жайлыбай, Артур Чупраков және Назарбай Саттархан өнер көрсетеді.
Жанкүйерлердің ерекше үміті жас спортшы Нұрмұхаммед Жайлыбайға ауып отыр. Ол биыл сәуір айында Бразилияда өткен жасөспірімдер арасындағы әлем чемпионатында қола жүлдеге ие болып, қазақстандық семсерлесудің болашағынан зор үміт күттіретін спортшы екенін дәлелдеген еді.
Соңғы жылдары Қазақстанда семсерлесу спорты қарқынды дамып келеді. Халықаралық ареналарда ел спортшыларының жиі көзге түсуі жүйелі дайындықтың нәтижесі. Каирдегі әлем кубогы қазақстандық қылышшылар үшін рейтингтік ұпай жинап қана қоймай, алдағы ірі жарыстар алдындағы маңызды сынақ болмақ.
